O mércores 29 de marzo tivo lugar o pregón da Semana Santa de Lugo deste ano 2023 no salón Rexio do Círculo das Artes da capital. Nesta ocasión foi pronunciado polo Xefe de Zona da Garda Civil de Galicia, o lucense Miguel Ángel González Arias.

O pregoeiro foi intercalando, ao longo do seu discurso, vivencias persoais con cuestións históricas. Entre as primeiras, a celebración do Domingo de Ramos en Santo Estevo de Furís (Castroverde), a festa de San Lázaro da Ponte (Lugo), a súa participación na procesión da Borriquiña (Lugo) ou a procesión do Santo Cristo do Perdón. Entre as cuestións históricas resaltou a figura de Narciso Gómez Luque, nomeado en 1903 cóengo de Lugo por “méritos de guerra”; caso único na historia da Igrexa e da Institución da Garda Civil. 

Antes do pregón actuou o Orfeón Lucense, dirixido por Marcos Manuel Fernández, acompañado polo organista Nacho Samena.