O bispo de Lugo, Mons. Alfonso Carrasco, presidiu na Catedral a Eucaristía solemne con motivo da festividade de San Froilán, patrón da cidade.
No inicio da súa homilía evocou a vida e o legado do santo, a quen definiu como “modelo, compañeiro no camiño, razón para non decaer na esperanza”. “A todos ofrécesenos o don inmenso do tempo da nosa vida, a liberdade dun corazón humano, o coidado da Providencia divina e a man de moitos irmáns”, subliñou. O prelado lembrou que cada persoa está chamada “a un esplendor de vida, a unha vocación e a unha fecundidade que só Deus coñece nas súas verdadeiras dimensións”.
Mons. Carrasco expresou tamén a súa gratitude a Deus “pola nosa terra e por Lugo; por nacer, polo pobo e a familia que encontramos, pola comuñón na súa Igrexa; por San Froilán e todos os nosos santos patróns”. Situou a figura do patrón lucense nun tempo de construción de civilización, marcado polo encontro e tamén polo conflito entre culturas e relixións.
O bispo destacou o papel de San Froilán como abade e formador de comunidades monásticas que, mediante unha vida de humildade e desprendemento, “foron xerme de vida nova”: “Non querían vivir guiados pola soberbia, a avaricia ou a luxuria, senón pola humildade, o desprendemento e o amor verdadeiro”, afirmou. Por iso, a súa testemuña, a súa elocuencia e a claridade da súa palabra foron recoñecidas e moi apreciadas polo pobo cristián.
Na parte central da homilía, Mons. Carrasco puxo como exemplo a San Froilán para defender a liberdade de conciencia, condición imprescindible —dixo— para construír a convivencia civil en paz: “Non podemos construír sen preservar e promover a liberdade de conciencia; non podemos ceder na defensa desta liberdade na nosa sociedade, permitir a súa censura por medo a conflitos”. E advertiu: “Quen nega a liberdade relixiosa e, por tanto, pretende impoñer a súa verdade ou simplemente controlar persoas e conciencias, equivócase. Non é nunca o modo de construír a cidade, nin de traballar pola paz”.
O bispo vinculou ademais a experiencia espiritual de San Froilán co crecemento humano e coa capacidade de transmitir a fe: “San Froilán non o conseguiu desde si mesmo, senón grazas á fe… O coidado verdadeiro do seu propio corazón, da súa propia persoa, feito posible pola súa dedicación á Palabra de Deus e ao Evanxeo, foi razón do seu crecemento persoal”. Desde esa experiencia, sinalou, nace a elocuencia e a forza de “transmitir e comunicar a fe en liberdade”.
Mons. Carrasco concluíu a súa intervención convidando a encomendarnos ao patrón e a pedir, xunto á “Virxe dos Ollos Grandes”, pola saúde dos enfermos, polos que están lonxe das súas familias e pola xente nova: “Pidámoslle que interceda polas nosas familias, polas nosas parroquias, polas nosas autoridades civís. Que a todos nos conceda celebrar con alegría este día de festa do noso patrón”.
